Jóhannes Albert lauk fullnaðarprófi í lögfræði frá lagadeild Háskólans í Reykjavík 2012 og öðlaðist málflutningsréttindi fyrir héraðsdómi vorið 2013.

Jóhannes er Suðurnesjamaður, fæddur 20. desember 1965, og á að baki margvísleg störf og mikla reynslu áður en áhugi vaknaði á því að leiðbeina og aðstoða fólk og fyrirtæki við að leita réttar síns á sviði lögfræði.

Reynsluheimur:
Jóhannes hefur starfað við almenn verkamannastörf í fiskvinnslu og byggingarstarfsemi. Hann hefur einnig starfað sem leiðbeinandi í grunnskóla, sem gjaldkeri í banka, við hugbúnaðargerð og sem blaðamaður.
Þyngst vegur margvísleg starfsreynsla hans innan lögreglunnar á Íslandi en hann hefur komið að lögreglustörfum, með reglubundnum hléum, frá árinu 1986 til ársins 2010.
Jóhannes hefur starfað við almenn lögreglustörf, við landamæragæslu og haft umsjón með leyfisveitingum og forvarnarstörfum. Þá hefur hann starfað við rannsóknir eignaspjalla- og þjófnaðarbrota, ofbeldis- og kynferðisbrota. Ennfremur hefur hann komið að rannsóknum einfaldra sem flókinna fjármunabrota þ.m.t. skattabrota en hann starfaði m.a. um eins árs skeið hjá Efnahagsbrotadeild Ríkislögreglustjóra.

Menntun:
• Héraðsdómslögmaður (hdl) maí 2013.
• Meistaranám (M.L) í lögfræði frá Háskólanum í Reykjavík 2012.
• Lögfræðingur (B.A) frá Háskólanum í Reykjavík, þann 19. júní 2010.
• Rannsóknarlögreglumaður (RLMI) frá Lögregluskóla ríkisins, þann 24. nóvember 2006
• Lauk námi í kerfisfræði og forritun frá Nýja tölvu- og viðskiptaskólanum í Hafnarfirði, 2000.
• Námskeið í rannsóknum efnahagsbrota hjá Efnahagsbrotadeild Ríkislögreglustjóra, 1998.
• Útskrifaðist sem almennur lögregluþjónn frá Lögregluskóla ríkisins, þann 27. maí 1993.
• Lauk námi með High School Dimploma frá Northern York High School í Pennsylvaniu í Bandaríkjum Norður-Ameríku, 1985.
• Lauk Verslunarprófi frá Verslunarskóla Íslands, 1983.

Áhugasvið innan lögfræðinnar:
Jóhannes er fyrst og fremst áhugamaður um mannlegt eðli og því eðlilegt að samskipti manna og fyrirtækja innbyrðis sem og samskipti þessara sömu aðila við fjármálafyrirtæki, vátryggingafélög, stofnanir ríkisins og refsivörslukerfið séu honum helst hugleikin. Segja má því að ekkert réttarsvið sé undanskilið en á lögfræðimáli mætti telja sifja- og erfðarétt, eignarétt, bótarétt, vinnurétt, félagarétt, stjórnsýslurétt og refsirétt að ógleymdum óumflýjanlegum og síbreytilegum skattaréttinum, sem hans helstu áhugsvið.

Félagslega hliðin:
Jóhannes er mikill áhugamaður um heilsu og íþróttir. Hann stundaði um árabil körfuknattleik í efstu deild á Íslandi, af mikilli gleði og með ágætis árangri. Lék hann stærstan hluta ferilsins með sigursælu liði Njarðvíkur en einnig lék hann með KR og Grindavík.